٣٠‏/٠٩‏/٢٠٠٩

البداية الحقيقة هنا


الحمد لله إطمئنيت من الناحية الدراسية على إني أنهيت تعليمي الجامعي والأكاديمي

:) :) :) :) يا ألف نهار أبيض يا ألف نهار مبروك (: (: (: (:

ومن هنا تبدأ الرحلة إللي المفروض فيها عليا إني أفرض نفسي وأكون لنفسي حياتي الخاصة بكل ما تعني الكلمة من معني

وأبدأ بموضوع الجيش والعسكرية وده عن قريب هنشوف إذا كنت داخل الجيش ولا في التأجيل

في خبر حلو على فكرة

أنا بدور على شغل دلوقتي .... واحد واخد باله من كلامي يسأل؟ طيب إيه الحلو في الموضوع؟

حلو أوي السؤال ده ممكن أرد عليه؟ طيب خلاص هرد أهو

الحلو في الموضوع إني بدور على شغل بس في فرق وهو إني بدور على شغل وأنا من جوايا عارف ومتأكد إني هلاقي شغل ومش كده وبس دا أنا كمان هلاقي الشغلانة الي على بالي وفي مزاجي واللي من خلالها هقدر بعون الله آخد الخطوة اللي بعد كده

وهي أني اكمل نص ديني .... أتجوز يعني يا بشر

ودي حاجة مهمه (أقصد الوظيفة) لأني مش هروح لأهل العروسه بطولي كده !! لازم أبقى حاجة الأول تخليهم يطمنوا على بنتهم المصونه والجوهرة المكنونه معايا.

على فكرة الموضوع مش صعب إطلاقا (أقصد إن الواحد يلاقي وظيفة) الشغل كتييييير على فكرة جدا بس في سؤال الأول؟؟

لأي واحد بيدور على شغل إنت عملت إيه لنفسك الأول عشان تلاقي شغل وأقصد بكده إنك إستثمرت نفسك في إيه عشان تلاقي الشغلانه اللي بتحبها

يعني مثلا إتعلمت ايه وعلمت نفسك إيه ... ضفت إيه جديد لنفسك ... عندك ايه ممكن اللي يخلي شركة تحتاجك تشتغل معاها؟

يعني الواحد مننا هو رأس مال نفسه يعني الإستثمار الحقيقي فيك ... لازم تبني نفسك الأول وبعدين تبقى تبني حياتك على اللي إنت بنيته في نفسك

مش عايز أصبغ كلامي بصبغة الحياة الخيالية بس على الأقل أنا شايف الحياة العملية كده ولأنها كده بجد فتبقى دي قمة الواقعية

وبما إن دي حياتي الجاية

فإحنا هنتكلم بعد كده في إن اللي ملوش قديم ملوش جديد
يعني لو في مشكلة في القديم مينفعش نسيبها ونمشي لازم حلول
الكلام في المواضيع دي هيعوز شوية وقت وكمان ترتيبات

سلام مؤقت وأشوفكم الحلقة اللي جاية في حياتي الجاية

٢٠‏/٠٩‏/٢٠٠٩

إيه رأيكم؟

إيه رأيكم؟

لو كل واحد فينا يقول اللي شاغل دماغه أوي اليومين دول
ده طبعا من غير مايكون شيء شخصي بالنسبه ليه كده يبقى من الطبيعي إنه مش هيقوله

يا ترى
اللي بتفكر فيه حاجة هتفيدك وتعليك وتزود صفات جميلة فيك؟
اللي بتفكر فيه شيء عايز تحصل عليه كنت دايما بتحلم بيه؟
 
  وحاجات كتير كمان على نفس المنوال

طيب
يا ترى في حاجة تانية غير الأولانية جاهزة في دماغك إنك هتعملها بعد اللي بتفكر فيه دلوقتي

نيجي بقه للنقطة اللي فيها مفتاح الحل
بتعمل ايه عشان تحقق اللي بتفكر فيه أول توصل لحل المشكلة اللي شغاله بالك أو أو أو

حاسس إنك بتقرب فعلا من هدفك
إنك قربت توصل
إنك بتخطي للأمام
أو بتعلا في السلالم


ممكن الهدف من تاني بوست ليا يكون مش واضح تمام بس المهم إني بدأت فعلا في تحريك الأفكار اللي في دماغي من خلال أنامل صوابع إيدي

سلام مؤقت في البوست الجاي إن شاء الله

٣١‏/٠٨‏/٢٠٠٩

هي دي البداية

السلام عليكم ورحمة الله وبركاته
 

إخواني وأخواتي الأعزاء هنتقابل هنا إن شاء الله على خير كل فترة وهيكون عندنا مواضيع كتير هنتكلم فيها وهناقشها واللي هتكون متعلقة بالحياة عموما القلم مع الوقت بيكتب اللي فيه النصيب ويارب ما يكتبش غير الخير والفايدة

وسلام الله عليكم ورحمته وبركاته